灣仔區係全港18個分區內，四個面積最小嘅分區之一，但原來景點一啲都唔少。我哋上次就行過寶雲道同姻緣石，今次再住上行，嚟到灣仔峽公園！點解會嚟灣仔峽公園？因為A姐睇過網上唔少人介紹推介呢度嘅童話小屋，啱晒大家weekend嚟打卡拍拖，但結果係非常失望！
提提你
1. 大家記住保持環境清潔，自己垃圾自己帶走，絕對唔可以破壞大自然環境
2. 公園設有公眾洗手間，方便遊客
前往方法
1. 乘坐新巴15號巴士，至灣仔峽道站下車
2. 灣仔峽公園設有咪錶位，自駕人士可以泊喺呢度，夠晒方便
灣仔峽公園
公園面積唔算大，但有涼亭、野餐檯凳、小食亭同洗手間，加上係唔少行山路徑嘅中途站，絕對係行山人士嘅補給休息地方！
童話小屋
今日特登行上嚟灣仔峽公園打卡，目標當然係呢個公園嘅童話小屋啦！A姐話之前睇網上介紹，呢間童話小屋上面寫住泰文，屋外被植物包圍，影相好似去咗童話國度㗎！但係今日嚟到，嗰屋頂爛咗，旁邊嘅樹木亦都失修。聽呢度嘅公園保安講，係因為之前啲野豬攻擊個屋頂（唔通隻野豬係飛天少女豬事丁？）。如果一心一意諗住上嚟打卡嘅就不必喇！
雖然呢個公園可能係一個失望嘅景點，但旁邊就係香港仔水塘嘅行山徑入口，我同A姐就由呢度行落去香港仔，為今次失望嘅旅程加番少少分啦！
490 Comments
Comments are closed.